Kenard i Džejms vodili Lejkerse do 1:0 protiv Hjustona

<!—->U meču u kojem su oba tima bila bez nekoliko važnih igrača, Lejkersi su djelovali organizovanije i mirnije, pa su kontrolisali veći dio utakmice. Domaći tim je rano nametnuo ritam, a napad je predvodio Lebron Džejms koji je već u prvoj četvrtini razigrao saigrače i upisao veliki broj asistencija.

Hjuston je ipak uspijevao da ostane u rezultatskom priključku zahvaljujući Alperenu Šengunu i Ridu Šepardu, pa je na poluvremenu prednost Lejkersa bila minimalna – 50:48.

U trećoj četvrtini Roketsi su nakratko preuzeli vođstvo, ali je uslijedio brz odgovor domaćina. Džejms je tada preuzeo veću odgovornost u napadu i pokrenuo seriju kojom su Lejkersi ponovo preuzeli kontrolu meča.<!—->

Odluka je pala u posljednjem periodu kada su domaći napravili ključnu seriju. Luk Kenard je pogodio dvije trojke, jednu je dodao i Džejms, pa je prednost Lejkersa brzo porasla na dvocifrenu razliku.

Najefikasniji u pobjedničkom timu bio je Kenard sa 27 poena, što je njegov najbolji plej-of učinak u karijeri. Džejms je utakmicu završio sa 19 poena i 13 asistencija, dok je Diandre Ejton dodao 19 poena i 11 skokova. Rui Hačimura ubacio je 14, a Markus Smart 15 poena.

Kod Hjustona su se istakli Alperen Šengun i Rid Šepard sa po 19 poena, dok je Amen Tompson dodao 17.