Toronto maksimalan u Kanadi: I pored 4/30 za tri poena Reptorsi savladali Klivlend

<!—->Reptorsi su slavili 93:89 u četvrtoj utakmici prve runde plej-ofa Istočne konferencije, a ključne poene postigao je Skoti Barns, koji je u posljednjem minutu pogodio slobodna bacanja za preokret.

Barns je meč završio sa 23 poena, devet skokova i šest asistencija, dok je Brendon Ingram takođe ubacio 23 poena. Ar-Džej Beret dodao je 18, a Kolin Marej-Bojls 15 poena i 10 skokova.

Toronto je do pobjede stigao uprkos šutu za tri poena 4/30, ali je u finišu imao više koncentracije od Klivlenda, koji je izgubio 18 lopti.

Donovan Mičel je za Kavalirse postigao 20 poena, od čega 12 u posljednjoj četvrtini, dok je Džejms Harden dodao 19. Ipak, Mičel je promašio dva šuta u posljednjih 25 sekundi, među njima i trojku za izjednačenje. Završio je utakmicu sa 6/24 iz igre i 4/12 za tri poena.

Sem Meril je ubacio 14 poena, a Džeret Alen imao 15 skokova za Klivlend, koji je u posljednjih minut i 54 sekunde utakmice primio seriju 10:2.

Kavalirsi su vodili 87:86 nakon što je Beret poentirao iz prodora, ali Mičel potom nije uspio da prenese loptu preko polovine terena na vrijeme. Toronto je dobio posjed, Barns je iznudio faul u prodoru i pogodio oba bacanja za 88:87, 34 sekunde prije kraja.

Obje ekipe su se mučile u šutu za tri poena pred NBA komesarom Adamom Silverom, koji je bio u dvorani. Klivlend je završio sa 10/40, dok je Toronto promašio prvih 14 pokušaja za tri, prije nego što je Beret pogodio sredinom druge četvrtine.

Ingram je promašio devet od prvih 10 šuteva, ali je kraj prvog poluvremena odigrao mnogo bolje, pogodio tri uzastopna šuta, uključujući trojku uz zvuk sirene za vođstvo tima Darka Rajakovića  38:36 na pauzi.

Peta utakmica igra se u srijedu u Klivlendu.