Budućnost predala krunu, Celje još jednom rasplakalo “Bemaks arenu”

<!—->

“Vučice” su na svom terenu stigle do titule samo u sezoni 2015/16. Tri puta su Podgoričanke gubile u finalu od Slovenki, a danas prvi put u polufinalu.

Budućnost je sa pet vezanih poena otvorila meč, ali je Celje brzo uhvatilo priključak i prišlo na minus jedan 7:6. “Vučice” su imali nakon toga i plus četiri 10:6, da bi Slovenke bacanjima Uranker preokrenule 12:11, na nešto malo više od tri minuta prije kraja uvdone dionice.

Minimalnu prednost gošće su imale i nakon deset minuta košarke 18:17.

Na startu 2. četvrtine Celje je imalo plus 20:17, međutim, izabranice Petra Stojanovića su poslije toga uhvatile ritam i tri minuta prije odlaska na veliki odmor stekle pet poena prednosti 31:26. Na poluvremenu “vučice” su imale četiri poena viška 34:30.

Nakon samo dva minuta igre u drugom poluvremenu, Budućnost je stekla rekordnih osam poena prednosti 38:30, a onda je uslijedio pad u igri, što je Celje znalo da iskoristi. Stirn je trojkom donijela preokret 43:42 na četiri minuta prije kraja tog dijela igre. Potom je viđena rezultatska klackalica, a Celje je uoči odlučujućih deset minuta imalo plus dva 52:50.

Bigović je na startu 4. četvrtine izjednačila, ali je potom Celje furioznom igrom napravilo seriju 10:0 Na četiri minuta prije kraja razigrala se Radonjić i sa pšest vezanih poena vratila nadu 62:58. Kod tog rezultata naša ekipa nije iskoristila napad, a na drugoj strani Šo je dala dva bacanja i odbila nalet.

Nije se, međutim, Budućnost predala, pa je trojkom Savković na 1.04 prije kraja prišla na samo koš minusa 64:63. Potom je Anžić ubacila dva penala, a na drugoj strani Radonjić je bila polovična sa linije slobodnih bacanja 66:64.

Isti učinak je imala Šo, pa je Budućnost krenula po produđetak. Ipak, Ilić nije bila precizna, pa je slavlje Slovenki moglo da počne…