Sutjeska osvojila Tuzlu za plasman u polufinale

Košarkaši Sutjeske su u Tuzli završili posao oko plasmana u polufinale ABA2 lige.

Opet je bilo drame, kao i u Nikšiću u prvoj utakmici, ali ovog puta se tim Marka Simonovića potrudio da završi sve mnogo mirnije – savladao je Slobodu 78:71 i nastavio borbu za plasman u elitni rang.

Koliko je Sutjeska bila dominantna u finišu pokazuje podatak da nije primila koš posljednja dva minuta i 10 sekundi.

Domaćin je u prvom poluvremenu konstantno bio u plusu, ali se u nastavku mnogo toga promijenilo nakon što je u prvih 20 minuta bilo 41:33 za Slobodu.

Imala je Sutjeska i minus 11 na polovini trećeg perioda, a posljednji je ušla sa minus dva (57:55) – bila je to najava furioznog završetka meča našeg predstavnika.

Kvame Von je sa linije slobodnih bacanja donio preokret (64:62), a domaćin posljednje poene postigao kada je Štulić izjednačio na 71:71.

Do kraja su Filip Barović, Balša Živanović i Kristofer Martin poenima donijeli Sutjesci veliki trijumf.

Martin je sa 15 koševa vodio Sutjesku, Von je imao 13, a po devet Barović i Živanović…

Nikšićani će se u polufinalu sastati sa boljim iz duela Zlatibora i TFT Skoplja (igra se majstorica).