Kapiten Arsenala: Frustrirajuće je, odlučili su detalji

Kapiten Arsenala Martin Edegor nije krio razočaranje nakon poraza od Mančester sitija u derbiju koji bi mogao da odluči trku za titulu.

„Tobdžije“ su na Etihadu imale svoje šanse, pogađali su stative, prijetili preko Kaija Haverca, ali lopta jednostavno nije htjela u gol.

„Frustrirajuće je. Bila je to jako tijesna utakmica, dva vrhunska tima. Na kraju su opet male razlike odlučile“, rekao je Edegor nakon poraza 2:1.

Arsenal je posebno bio opasan u drugom poluvremenu, kada je potpuno pritisnuo rivala.

„Drugo poluvrijeme je bilo baš dobro. Imali smo dobre momente, vršili pritisak u šesnaestercu. Ali takve utakmice odlučuju detalji.“

Uprkos porazu, Edegor poručuje da nema mjesta panici.

„Moramo da nastavimo. Biće borba do samog kraja. Držimo se zajedno, radimo i idemo dalje.“

Arsenal je i dalje lider, ima tri boda više od Sitija, ali i utakmicu više od rivala.